17.06.2022

Lisey və gimnaziyalara imtahanlar başlayıb!

İyunun 17-dən ölkə üzrə bəzi lisey və gimnaziyalara qəbul imtahanlarına start verilib.

İmtahanlar 18, 19 və 20 iyun tarixlərində davam edəcək. Qəbul imtahanlarında 20 minə yaxın şagirdin iştirakı gözlənilir.

IV-VIII sinif şagirdləri arasında keçirilən imtahanlar Bakı şəhəri ilə yanaşı, Gəncə, Şirvan və Şəki şəhərləri, Quba, Şəmkir, Oğuz, Biləsuvar, Şamaxı, Ağdaş və Ağstafa rayonlarında da təşkil olunur. İmtahan zamanı şagirdlər Azərbaycan dili və riyaziyyat fənləri ilə yanaşı, məntiqi təfəkkürün yoxlanılması üçün qapalı test tapşırıqlarını cavablandıracaqlar. Yuxarı sinif şagirdlərinə isə əlavə olaraq fizika və kimya fənləri üzrə tapşırıqlar təqdim olunacaq.

Şagirdlər imtahan nəticələrini 24 iyun tarixindən etibarən qeydiyyatdan keçdikləri şəxsi kabinetləri vasitəsilə öyrənə biləcəklər.

Qeyd edək ki, artıq 2-ci ildir ki, lisey və gimnaziyalara qəbul mərkəzləşdirilmiş imtahan sistemi vasitəsilə həyata keçirilir. Mərkəzləşdirilmiş qəbul prosesi zamanı şagirdlərə imtahan nəticələrinə, yəni toplanılan bala uyğun olaraq, müvafiq lisey və gimnaziya seçimi etmək imkanı yaradılacaq. Yeni mexanizmə əsasən, şagirdlər 3 təhsil müəssisəsinə qəbul üçün sorğu göndərə biləcək.